Mancini telur að Man City þurfi fleiri leikmenn

Roberto Mancini knattspyrnustjóri Manchester City telur að liðið þurfi að styrkja sig enn frekar á leikmannamarkaðinum. Ítalinn var ekki sáttur eftir 2-2 jafnteflisleikinn gegn Fulham í gær en eigendur Man City hafa keypt leikmenn fyrir um 73 milljarða kr. á síðustu þremur árum eða sem nemur 400 milljónum punda. 

Man City missti niður tveggja marka forskot gegn Fulham en liðið hafði unnið fyrstu fjóra leikina í ensku úrvalsdeildinni. Mancini er ekki í vafa um að hann þurfi meiri „breidd“ í liðið en hann gat ekki notað James Milner og Nigel De Jong í gær en þeir voru meiddir.

„Ég get bara skipt inn bakvörðum í liðinu – það vantar leikmenn eins og staðan er í dag. Ég er bara með tvo miðjumenn þar sem ég gat ekki valið Jong og Milner,“ sagði Mancini en hann hefði kosið að hvíla þá Yaya Toure og Gareth Barry í leiknum gegn Fulham.

Knattspyrnustjórinn telur að leikmenn liðsins þurfi að vera grimmari í hugsun og nýta færin betur. „Hvaða lið kemur hingað til London og er með boltann í 70% af leiknum. Sama vandamál var gegn Wigan þar sem við fengum 15 færi í fyrri hálfleik en skoruðum bara eitt mark,“ sagði Mancini.