Pulis: Er óreyndur í Evrópukeppninni

Tony Pulis viðurkennir að hann viti í raun ekki út í hvað hann sé að fara með þátttöku Stoke City í Evrópudeild UEFA í vetur. Hann sé algerlega óreyndur á þessu sviði.

Stoke komst í Evrópukeppnina með því að komast í úrslit ensku bikarkeppninnar og komst inn í Evrópudeild UEFa með því að slá út Hajduk Split og FC Thun í forkeppninni.

Liðið hefur leik í riðlakeppni Evrópudeildarinnar í kvöld er liðið mætir Dynamo Kiev, fastagestum í Evrópukeppnum undanfarinna ára.

„Ég veit jafn lítið um þessi mál og allir aðrir hjá félaginu,“ sagði Pulis. „Ég ætla ekki að halda því fram að ég sé alger snillingur þegar kemur að þessu og hinu.“

Pulis hefur staðfest að Wilson Palacios, sem kom til liðsins frá Tottenham í síðasta mánuði, verði í byrjunarliði Stoke í kvöld.