Sunderland jafnaði á ögurstundu

Það var boðið upp á dramatík í baráttunni um norðrið í ensku úrvalsdeildinni í dag. Sunderland og Newcastle gerðu þá 1-1 jafntefli í hörku leik.

Newcastle var lengst af betri aðilinn en gekk illa að brjóta ísinn.

Kevin Nolan skoraði loksins í seinni hálfleiknum. Hann setti boltann í markið með hælnum eftir að Shola Ameobi skallaði hornspyrnu til hans í markteignum.

Allt leit út fyrir sigur Newcastle en eftir mikla pressu í uppbótartíma jafnaði Sunderland. Asamoah Gyan fékk þá boltann í sig eftir að Steve Harper varði skot frá leikmanni Sunderland. Gyan vissi ekkert hvaðan á sig stóð veðrið fyrr en boltinn flaug í netið og hann fagnaði ákaft ásamt öðrum á Leikvangi Ljóssins.

Lokatölur 1-1 en Newcastle-menn eru eflaust sársvekktir eftir að hafa verið betri aðilinn lengi vel.