Slær á vonir um að ný eyja sé að verða til

Útlit er fyrir að jarðhræringum og gosvirkni á hafsbotni rétt sunnan við eyjuna El Hierro, sem er hluti af Kanaríeyjaklasanum, sé lokið eftir margra mánaða óróa.

Gosefni hefur streymt upp úr sprungu á hafsbotni og þúsundir jarðskjálfta hafa gengið yfir. Það hefur meðal annars orðið til þess að yfirvöld á Kanaríeyjum rýmdu hús í bænum La Restinga sem er í nágrenni við gossvæðið. Alls búa ellefu þúsund manns á eyjunni El Hierro.

Samkvæmt vefnum Earthquake Report, sem fylgist náið með framvindu mála, hefur hætt að gjósa. Það þýðir þó ekki að virkni sé lokið, en gosi þessu hefur verið líkt við Surtseyjargosið hér við land.

Gosefni hefur hlaðist upp á sjávarbotni og náð 100 metra yfir botn, en ennþá eru þó 150 metrar upp að sjávarborði.

Á yfirborði sjávar suður af eynni hefur aska úr sprungunni myndað gríðarstóran flekk og fjöldi fiska hefur drepist.

Margir höfðu séð fram á að ný eyja yrði þarna til, sem yrði fyrsta nýja eyjan í klasanum í rúm milljón ár. Að sögn Daily Mail var heimafólk þegar farið að stinga upp á nöfnum fyrir væntanlega eyju. Um fimm hundruð uppástungur höfðu borist, þar á meðal Atlantis. Þá var umræða í spænskum fjölmiðlum um það hver myndi fá yfirráð yfir eyjunni þegar hún risi upp.

Slíkar vangaveltur virðast þó enn um sinn vera ótímabærar en óvíst er hvort framhald verður á gosinu og hvort eyja muni þá á endanum rísa úr sæ. - þj