Fjölskylda Gaddafís vill fá líkið - óvíst hvort krufning fari fram

Krufning á líki Muammars Gaddafis, fyrrum leiðtoga Líbíu, á að fara fram í dag í borginni Misrata. Fréttir eru hins vegar misvísandi af því hvort krufningin muni verði heimiluð af bráðabirgðastjórn uppreisnarmanna.

Útför Gaddafis hefur verið frestað því bráðabirgðastjórn uppreisnarmanna kemur sér ekki saman um hvar og hvernig eigi að leggja hinn fallna leiðtoga til hinstu hvílu.

Fjölmiðlum ber hins vegar ekki saman um hvort líkið verði krufið. Á vefsíðu breska dagblaðsins The Telegraph er haft eftir talsmanni bráðabirgðarstjórnar uppreisnarmanna, Fathi al-Bashaagha, að enginn muni kryfja Gaddafi. Hvorki í dag né nokkurn annan dag. Uppreisnarmennirnir sem handsömuðu Gaddafi neita að hafa drepið hann og virðast nú neita kröfu Sameinuðu þjóðana og mannréttindasamtaka um að krufning verði gerð svo læknisfræðileg niðurstaða á dánarorsök leiðtogans verði rannsökuð og opinberuð.

Aðrir stórir fjölmiðlar fullyrða hins vegar að Gaddafi verði krufinn í dag.

Sjónvarpsstöðin Al-rai, sem hefur verið miðill stuðningsmanna Gaddafis í átökunum, greindi frá því í morgun að fjölskylda Gaddafis vilji fá líkið afhent. Í því sem sagt er vera yfirlýsing frá fjölskyldu hans segir að kallað sé eftir stuðningi sameinuðu þjóðana, Amnesty, og bráðabirgðarstjórnarinnar til að tryggja að fjölskyldan fái líkið svo hægt sé að jarða það í samræmi við hefðir og reglur múslima.

Þá virðist sem bráðabirgðarstjórnin geti enn ekki komið sér saman um hvernig eigi að hafa útför Gaddafis. Til greina kemur að jarða hann í heimabæ sínum, Sirte, Misrata, þar sem líkið er núna, eða fleygja líkinu í sjóinn á ótilgreindum stað til að sporna gegn því að gröf Gaddafis verði að einhverskonar helgidómi stuðningsmanna hans.