Óku inn í hóp og drápu þrjá

Þrír menn létust í óeirðum í Birmingham aðfaranótt miðvikudags. Mennirnir, sem voru á aldrinum 20 til 31 árs, voru í hópi fólks sem reyndi að verja verslanir í hverfi sínu fyrir þjófum þegar bíl var ekið á þá. Ökumaðurinn flúði af vettvangi en maður er nú í haldi lögreglunnar grunaður um að hafa valdið dauða mannanna. Atvikið er rannsakað sem morðmál.

Tariq Jahan, faðir eins hinna látnu, bað um að ekki yrði gripið til hefnda vegna dauða mannanna og hvatti ribbalda á götum Bretlands til þess að hætta ólátum og snúa til síns heima.

Lítil sem engin mótmæli voru í London á þriðjudagskvöld, en sextán þúsund lögreglumenn voru á götum úti í borginni. Það er tæplega þrefalt meira en kvöldin á undan, þegar mikil ólæti voru víðs vegar um borgina. Einnig var tiltölulega rólegt í höfuðborginni í gærdag en nokkur ólga var enn í borgum víða um landið.

Dómstólar í London voru opnir fram eftir kvöldi í gær til þess að hægt væri að leiða alla þá sem hafa verið ákærðir fyrir dómara. Um tólf hundruð manns hafa verið handteknir vegna óeirða í Bretlandi, þar af um 800 í London.

Meðal þeirra sem komu fyrir rétt í London var ellefu ára gamall drengur, sem játaði að hafa stolið úr verslun Debenhams í óeirðunum. Hann eyddi nóttinni á undan í fangaklefa þrátt fyrir ungan aldur, en mun koma fyrir ungmennarétt í lok mánaðarins. Hann er nú í útivistarbanni frá klukkan sex á kvöldin til sex á morgnana.

Ólætin voru mest í Birmingham, Manchester og Liverpool á þriðjudagskvöldið auk þess sem lítilsháttar átök urðu í Leicester, Wolverhampton, West Bromwich, Bristol, og Gloucester.

Bretar munu ekki láta „hræðslumenningu“ stjórna götunum, sagði David Cameron forsætisráðherra í gær. Hann sagði að gripið yrði til allra ráða til að koma á lögum og reglu á ný. „Ekkert er út af borðinu,“ sagði hann. Meðal annars hefur verið rætt um að nota háþrýstivatnsbyssur til að dreifa fjöldanum, en slíkt hefur aldrei verið notað í Bretlandi.

Niðurskurður ríkisstjórnarinnar hefur verið gagnrýndur í tengslum við óeirðirnar en lögreglan á að skera mikið niður á næstu árum og fækka lögreglumönnum um sextán þúsund fyrir árið 2015. Boris Johnson borgarstjóri í London skoraði á ríkisstjórnina að endurskoða áætlanir sínar.

thorunn@frettabladid.is,

thorgils@frettabladid.is