Mirror: Konungsfjölskyldan í Katar með nýtt risaboð í Man. United

Enska götublaðið The Mirror fullyrðir í dag að konungsfjölskyldan í Katar ætli að bjóða meira en 275 milljarða króna, 1,5 milljarð punda, í enska knattspyrnufélagið Manchester United.

Þetta er ekki í fyrsta sinn sem að hinir moldríku Katar hafa verið sagðir í þessum hugleiðingum en það hefur ekki borið árangur hingað til. Núverandi eigendur United, hin bandaríska Glazer-fjölskylda, hefur ekki viljað selja félagið.

En nú fullyrðir The Mirror að Glazer-fjölskyldan sé mögulega tilbúin í viðræður. Nýtt tilboð mun vera í burðarliðnum og að gengið verði jafnvel frá samningum strax í næstu viku.

Katar hefur verið mikið í umræðunni í knattspyrnuheiminum að undanförnu. Fyrr á árinu var ákveðið að HM 2022 verður haldið í landinu og þá keyptu meðlimir konungsfjölskyldunnar franska knattspyrnufélagið Paris Saint-Germain. Ætla þeir sér stóra hluti í framtíðinni með PSG.

Þetta gætu talist góð tíðindi fyrir Manchester United, enda eru Glazer-feðgarnir ekki mjög vinsælir hjá stuðningsmönnum liðsins. Með þessu væri United á pari við grannliðið Manchester City, sem hefur eytt gríðarlegum fjármunum í leikmannakaup síðan að félagið var keypt af öðrum vellauðugum olíufurstum frá Arabíuskaga.