Fer Arshavin til Chelsea í sumar?

Rússinn Andrey Arshavin gæti verið á förum frá Arsenal í sumar. Samkvæmt fréttum í Englandi hefur Chelsea áhuga á að næla sér í Arshavin. Eigandi Chelsea, Rússinn Roman Abramovich, vill ólmur fá landa sinn til félagsins.

Arshavin er sagður óánægður hjá Arsenal en hann hefur vermt varamannabekkinn nokkuð að undanförnu. Hann hefur ekki verið í sínu besta formi að undanförnu og átt erfitt með að komast í byrjunarliðið. Arshavin á 18 mánuði eftir af samningi sínum hjá Arsenal og lítið hefur gengið í samningaviðræðum um lengri samning.

Hann hefur skorað fjögur mörk og er með níu stoðsendingar í ensku deildinni í vetur. Talið er að Arshavin geti farið fyrir um 10 milljónir punda í sumar.