KR-ingar skoruðu sex mörk í fyrsta mótsleik ársins 2011

KR vann 6-4 sigur á Fylki í fyrsta leik sínum á Reykjavíkurmótinu í fótbolta sem fram fór í Egilshöllinni í gærkvöldi en Víkingar unnu 3-2 sigur á ÍR í hinum leik kvöldsins. Öll þessi lið eru í A-riðli

Kjartan Henry Finnbogason skoraði tvö mörk fyrir KR, annað út víti, en hin mörkin gerðu þeir Baldur Sigurðsson, Viktor Bjarki Arnarsson, Guðjón Baldvinsson og Bjarni Guðjónsson (víti). KR-ingar komust í 6-1 í leiknum en Fylkismenn skoruðu þrjú mörk á síðustu 20 mínútum leiksins.

Guðjón Baldvinsson átti þátt í fimm af sex mörkum KR-liðsins og fiskaði meðal annars báðar vítaspyrnurnar sem liðið fékk í leiknum. Davíð Þór Ásbjörnsson, Albert Brynjar Ingason, Jóhann Andri Kristjánsson og Andrés Már Jóhannesson skoruðu mörk Fylkis.

Gunnar Helgi Steindórsson skoraði tvö mörk fyrir Víkinga og Egill Atlason gerði það þriðja úr vítaspyrnu. Kristján Ari Halldórsson skoraði bæði mörk ÍR-inga en hann kom þeim í 1-0 og minnkaði síðan muninn í 3-2.

Víkingar töpuðu 1-3 fyrir Fjölni í fyrsta leik sínum en ÍR-ingar hafa byrjað mótið á tveimur tapleikjum.