Kynhormón minna í feðrum

Þegar menn eignast barn minnkar framleiðsla líkama þeirra á kynhormónum um allt að helming. Þetta er niðurstaða nýrrar bandarískrar rannsóknar.

Þegar kynhormónin minnka í líkamanum eykst áhugi karlmanna á föðurhlutverkinu í réttu hlutfalli. „Að ala upp barn er svo mikið verkefni að samvinna er nauðsynleg. Rannsóknir okkar hafa sýnt að karlmaðurinn er náttúrulega forritaður til að taka þátt í því verkefni," segir Christopher Kuzawa, sem stýrði rannsókninni.

Lífsýni var tekið úr 600 karlmönnum við 21 árs aldur. Í ljós kom að hlutfall kynhormónsins í þeim sem ekki eignuðust börn minnkaði um 14% í takt við aldur þeirra. Þeir sem hins vegar eignuðust börn horfðu upp á 34% lækkun að meðaltali. Mest var lækkunin hjá þeim sem mestan þátt tóku í uppeldinu.