Chavez segir Venesúela hafa verið rændir sigri

Forseti Venesúela, Hugo Chavez, er allt annað en sáttur við dómgæsluna í viðureign Paragvæ og Venesúela. Chavez fór mikinn á Twitter-síðu sinni að leik loknum. „Þeir rændu okkur sigurmarki," skrifaði Chavez með hástöfum.

Venesúela kom liða mest á óvart í Suður-Ameríkukeppninni sem lýkur um helgina. Í undanúrslitum á miðvikudag mættu þeir Paragvæ og duttu út að lokinni vítaspyrnukeppni. Þjóðin hefur hingað til verið aðhlátursefni í alþjóðaknattspyrnu en virðist á mikilli uppleið ef marka má frammistöðu landsliðsins á mótinu.

„Það er mín einlæga skoðun, byggð á staðreyndum, að ÞEIR RÆNDU OKKUR SIGURMARKI! Ég vona að ég móðgi engann með því að segja það," sagði forsetinn skoðanaglaði.

Landslið Venesúela er þekkt sem „vinotino" sem þýðir rauðvín. Ástæðuna er að finna í vínrauðu keppnistreyjum liðsins.

„Í sannleika sagt sigruðu vinotino í gærkvöldi. Paragævi lagði okkur ekki að velli. Við Fidel (Castro) sáum báðir að við vorum rændir marki," bætti Chavez við.

Rétt er að taka fram að markið umrædda var réttilega dæmt af vegna rangstöðu.

Paragvæ og Úrúgvæ mætast í úrslitaleik keppninnar í Buenos Aires á sunnudag.