Martinez: Fabregas er klókur svindlari

Roberto Martinez, þjálfari Wigan, er allt annað en sáttur með framgöngu Spánverjans Cesc Fabregas í leik Wigan gegn Arsenal í gær. Leikurinn lyktaði með 3-0 sigri Arsenal og léku Wigan einum leikmanni færri eftir að Gary Caldwell var vikið af velli eftir viðskipti sín við Fabregas innan vítateigs.

„Ég þekki Fabregas vel og hann er stórkostlegur leikmaður. Hann er hins vegar mjög klókur í að kaupa sér dóma hjá dómurunum. Það var snerting en hversu mikið er Fabregas að leita eftir snertingunni," spyr Martinez sem þó getur þakkað markverði sínum að sigur Arsenal var ekki stærri.

„Cesc kemur úr annarri menningu þar sem þú ert talinn vera klókur fyrir að svindla. Í Englandi er hins vegar horft á fótbolta með öðrum augum og þá er þetta talið svindl."