Stoke gerir lokatilboð í Crouch og Palacios

Stoke City hefur gert lokatilboð í framherjann Peter Crouch og miðjumanninn Wilson Palacios leikmenn Tottenham. Stoke hefur styrkt sig töluvert varnarlega í sumar með kaupunum á miðvörðunum Jonathan Woodgate og Matthew Upson.

„Við höfum lagt fram lokatilboð okkar. Boltinn er í þeirra höndum. Tilboð okkar er ekki til viðræðu,“ sagði Peter Coates stjórnarformaður Stoke í útvarpsviðtali á Englandi.

Mikill metnaður virðist vera hjá Stoke um þessar mundir. Liðinu gekk vonum framar á síðustu leiktíð, hafnaði í 13. sæti í deildinni og komst í úrslit bikarsins. Crouch og Palacios þykja nokkuð stór nöfn þegar kemur að félögum á borð við Stoke.

Crouch hefur verið á mála hjá Tottenham frá árinu 2009. Hann hefur hins vegar átt erfitt með að vinna sér fast sæti í liðinu og verið orðaður við brotthvarf í töluverðan tíma. Hann var áður á mála hjá Portsmouth, Liverpool og Southampton.

Palacios, sem er frá Hondúras, hefur spilað yfir 60 leiki fyrir Tottenham undanfarin tvö og hálft ár. Hann kom til félagsins frá Wigan.