Ferguson húðskammaði Ryan Giggs

Enska slúðurblaðið Daily Star greinir frá því að Ryan Giggs leikmaður Manchester United hafi fengið hárblásarameðferðina hjá Alex Ferguson fyrir æfingu liðsins í gær. Giggs yfirgaf æfingasvæðið meðan liðsfélagar hans voru enn að hita upp.

United-liðið hóf æfingar í gær eftir sumarfrí. Talið er að Ferguson sé allt annað en sáttur við fréttir af Giggs undanfarnar vikur og hafi látið Walesverjann 37 ára heyra það.

Ferguson mætti á Carrington æfingasvæðið klukkan 7:30 og Giggs tuttugu mínútum síðar. Þeir funduðu svo í einrúmi en að fundinum loknum yfirgaf Giggs æfingasvæðið rétt í þá mund sem liðsfélagar hans voru að hefja æfinguna klukkan 9.

Fulltrúi United staðfesti við enska slúðurblaðið að Giggs hefði yfirgefið æfingasvæðið þremur tímum fyrr en aðrir leikmenn liðsins.