Dalglish: Leikformið skiptir meira máli en nafnið

Kenny Dalglish, stjóri Liverpool, segir að hann muni láta þá leikmenn spila sem standa sig best hverju sinni, óháð því hvað þeir heita.

Steven Gerrard er að komast aftur af stað eftir langvarandi meiðsli og þá hefur varnarmaðurinn Jamie Carragher ekki verið sannfærandi í upphafi leiktíðar.

Dalglish keypti marga leikmenn í sumar og er með breiðan hóp leikmanna til að velja úr fyrir leikinn gegn Tottenham á morgun.

„Enginn fær sæti í liðinu út á það sem hann gerði áður fyrr,“ sagði Dalglish við enska fjölmiðla. „Þeir sem hafa verið hér sem lengst vita það manna best. Þeir sjálfir hefðu engan áhuga á því enda gera þeir miklar kröfur til sín.“

Dalglish bætir þó við að framlag leikmanna til félagsins í gegnum árin muni aldrei gleymast. „Það vitum við sjálf manna best.“