Kean: Vona að 99 prósent áhorfenda séu ánægðir

Steve Kean, stjóri Blackburn, var vitanlega hæstánægður með 4-3 sigur sinna manna á Arsenal í dag.

Fyrir leikinn mótmæltu nokkrir stuðningsmanna Blackburn og kröfðust þess að Kean yrði rekinn úr sínu starfi. Fyrir leikinn í dag var Blackburn með eitt stig í neðsta sæti deildarinnar og er það versta byrjun félagsins í sögu ensku úrvalsdeildarinnar.

„Úrslitin skipta vissulega máli en það skiptir líka máli að spila vel. Við höfum nú spilað vel í þremur leikjum,“ sagði Kean eftir leikinn.

„Fyrir leikinn mótmæltu um 200 manns og var það aðeins eitt prósent af þeim sem mættu á leikinn. Ég vona að hin 99 prósentin geti farið ánægð heim í dag.“