Segir Rauðu Khmerana hafa verið góða gæja

Nuon Chea, sem var næstráðandi hjá Rauðu Khmerunum, sagði í dag að hann og aðrir liðsmenn í Rauðu Khmernunum væru ekki slæmir menn. Hann neitaði því að Rauðu Khmerarnir bæru ábyrgð á láti 1,7 milljón manna á áttunda áratug síðustu aldar. Þetta kom fram í réttarhöldum yfir Chea í dag.

Chea er ásamt tveimur öðrum forystumönnum Khmeranna, sakaður um glæpi gegn mannkyninu, þjóðhreinsanir, trúarofsóknir og pyntingar. Allir þrír neita þeir sök. Pol Pot var hæstráðandi í Rauðu Khmerunum en hann hafði tvo næstráðendur og var Chea annar þeirra.

Nuon Chea segir að Víetnamar beri ábyrgð á láti þeirra 1,7 milljóna manna sem dóu.