Pólitísk örlög Berlusconi talin ráðast í dag

Silvio Berlusconi virðist vera kominn að endalokum í pólitík og dagar hans taldir sem forsætisráðherra Ítalíu.

Ítalska þingið greiðir atkvæði um efnahagsfrumvarp ítölsku ríkisstjórnarinnar í dag. Verði málið fellt er það álitið jafngilda vantrausti á Berlusconi og stjórnina, að sögn erlendra fjölmiðla. Dagar Berlusconi væru þar með taldir í pólitík.

Vextir á ítölskum ríkisskuldabréfum til tíu ára fóru yfir 6,5% í gærdag og þar með eru skuldir ítalska ríkisins að verða ósjálfbærar. Talið er að brottför Berlusconi úr embætti forsætisráðherra muni auka traustið að nýju á fjármálum hins opinbera á Ítalíu. Þannig tóku hlutabréfavísitölur kipp upp á við í gærdag þegar orðrómur um afsögn Berlusconi fór á kreik.

Athyglisverð kenning er á sveimi um að Mario Draghi nýráðinn seðlabankastjóri Evrópska seðlabankans hafi hætt að kaupa ítölsk ríkisskuldabréf og það beinlínis til að fella Berlusconi. Draghi sem einnig er Ítali mun hata Berlusconi eins og pestina og þráir ekkert heitar en að koma ráðherranum fyrir pólitískt kattarnef.