Berlusconi mun hverfa úr embætti

Forsætisráðherra Ítalíu, Silvio Berlusconi, hefur tilkynnt að hann ætli að segja af sér um leið og efnahagsumbætur verða samþykktar á þinginu.

Berlusconi glataði meirihluta sínum þegar kosið var um fjárlagafrumvarp ríkisstjórnar hans í dag. Frumvarpið var þó samþykkt.

Í kjölfarið á slæmu efnahagsástandi Ítalíu hafa bæði andstæðingar sem og bandamenn hans hvatt hann til að segja af sér.

Berlusconi hefur farið mikinn í ítalskri pólitík síðustu 17 ár. Ríkisstjórn hans hefur þurft að ganga í gegnum 50 vantrauststillögur.

Hneykslismál Berlusconi hafa verið afar áberandi síðustu misseri. Hann hefur verið sakaður um fjárdrátt og skattsvik, ásamt því að vera grunaður um að hafa mútað dómara.

Ítalskir fjölmiðlar greindu einnig frá því að Berlusconi hafi greitt stúlku undur lögaldri til að sænga hjá sér.

Árið 1993 stofnaði Berlusconi stjórnmálaflokkinn Forza. Ári seinna tók hann við forsætisráðherraembættinu. Berlusconi er vellauður. Hann stjórnar fyrirtækjum og stofnunum sem eru áberandi í trygginga- og auglýsingageiranum og fjölmiðlun.