Wigan aldrei byrjað betur

Wigan vann í dag 2-0 sigur á QPR og er enn ósigrað eftir þrjár umferðir. Er það besta byrjun liðsins í ensku úrvalsdeildinni frá upphafi.

Franco Di Santo skoraði bæði mörk Wigan í dag en QPR átti samt heilmikið í leiknum. Adel Taarabt átti tvö skot í slánna í fyrri hálfleik og Bruno Perone, félagi hans hjá QPR, skaut í rammann í seinni hálfleik eftir hornspyrnu Taarabt.

Wigan hefur mætt nýliðunum þremur - Norwich, Swansea og nú QPR - í fyrstu umferðunum en liðið gerði jafntefli í fyrstu tveimur leikjunum.

Leikurinn var fjörlegur í dag en sóknarkraftur Wigan var einfaldlega meiri í leiknum og því fór sem fór.

Heiðar Helguson var á bekknum hjá QPR og kom ekki við sögu. QPR er með þrjú stig eftir þrjá leiki.

Staðan í ensku úrvalsdeildinni