Henderson og Adam á blað er Liverpool fór létt með Bolton

Jordan Henderson og Charlie Adam skoruðu báðir sín fyrstu mörk fyrir Liverpool í dag er liðið vann sannfærandi 3-1 sigri á Bolton í ensku úrvalsdeildinni.

Henderson opnaði markareikninginn sinn á fimmtándu mínútu leiksins með glæsilegu skoti eftir laglega sókn þar sem Luis Suarez fór illa með varnarmenn Bolton.

Liverpool gerði svo út um leikinn á tveggja mínútna kafla snemma í síðari hálfleik. Varamaðurinn Martin Skrtel skoraði fyrst með skalla eftir hornspyrnu Charlie Adam áður en Adam sjálfur skoraði með laglegu skoti utan teigs.

Ivan Klasnic klóraði svo í bakkann fyrir Bolton í uppbótartíma er hann færði sér mistök Jamie Carragher í vörn Liverpool í nyt.

Annars var frammstaða Liverpool afar sannfærandi og sigurinn síst of stór. Liðið er nú komið með sjö stig af níu mögulegum og byrjunin á þessu tímabili langt um betri en á því síðasta.

Henderson og Adam komu báðir til félagsins í sumar og hafa byrjað vel á tímabilinu. Þeir léku báðir á miðju Liverpool í dag.

Staðan í ensku úrvalsdeildinni