Wenger vill kaupa þrjá leikmenn til viðbótar

Mikið hefur verið fjallað um leikmannamál Arsenal og þá sérstaklega hversu fá leikmenn Arsene Wenger, stjóri liðsins, hefur keypt.

Wenger sagði í samtali við enska fjölmiðla að hann ætli sér að kaupa þrjá leikmenn áður en lokað verður fyrir félagaskipti um næstu mánaðamót.

Arsenal seldi á dögunum þá Cesc Fabregas og Samir Nasri fyrir tæplega 60 milljónir punda. Wenger hefur því nægt fjármagn til að kaupa nýja leikmenn.

„Ég er orðinn óþreyjufullur því ég vil kaupa leikmenn og er að reyna allt sem ég get til þess. Við erum háðir því að þeir aðilar sem eiga þessa leikmenn vilji selja þá,“ sagði Wenger.

„Eins og er erum við nokkuð fáliðaðir. En ef okkur tækist að fá þessa leikmenn værum við orðnir samkeppnishæfir um titilinn. Ég er almennt séð bjartsýnn því við erum með marga góða unga leikmenn sem geta tekið stórt stökk fram á við á skömmum tíma.“