Park Chu-Young á leið til Arsenal - skrópaði í læknisskoðun hjá Lille

Samkvæmt enskum fjölmiðlum mun Suður-Kóreumaðurinn Park Chu-Young ganga til liðs við Arsenal um helgina.

Hann er landsliðsfyrirliði Suður-Kóreu og fyrrum liðsfélagi Eiðs Smára Guðjohnsen hjá AS Monaco, þar sem Park er enn í dag.

Fullyrt er að þessi 26 ára gamli sóknarmaður muni gangast undir læknisskoðun hjá Arsenal í dag eða snemma á morgun. Að því loknu muni hann skrifa undir samning við félagið.

AS Monaco féll úr frönsku úrvalsdeildinni í lok síðustu leiktíðar. Park hafði einnig verið orðaður við Fulham og var næstum genginn til liðs við Lille í Frakklandi áður en Arsene Wenger, stjóri Arsenal, skarst í leikinn.

Park var þá hálfnaður með læknisskoðun sína hjá Lille en mætti svo skyndilega ekki á tilsettum tíma til félagsins til að klára hana í morgun.

„Við höfum ekki fengið símtal - ekki neitt,“ sagði Michel Seydoux, forseti Lille, við franska fjölmiðla í dag.

„Okkur skilst að hann geti verið hjá Arsenal. Monaco veit ekkert um málið og eru jafn hissa á þessu og við. Það var búið að ganga frá þessu öllu saman.“