Drogba var án meðvitundar í 30 mínútur en er á batavegi

Didier Drogba er sagður hafa verið meðvitundarlaus í 30 mínútur eftir höfuðhöggið sem hann fékk í leik Chelsea og Norwich í dag.

Chelsea hefur staðfest á heimasíðu sinni að Drogba fékk vægan heilahristing en að hann verði útskrifaður af sjúrkrahúsi í kvöld. Myndatökur og rannsóknir sýndu ekkert óeðlilegt.

Drogba fékk höggið frá Paul Ruddy, markverði Norwich, þegar þeir stukku báðir upp í boltann. Ruddy ætlaði að kýla boltann frá marki en hæfði þess í stað Drogba.

Endursýningar í sjónvarpi sýndu að Drogba rotaðist umsvifalaust og féll hann meðvitundarlaus til jarðar. Var það óhugnaleg sjón.

Ruddy fékk svo að líta rauða spjaldið síðar í leiknum fyrir að taka niður Ramires en Chelsea vann leikinn, 3-1.