Þörf á að rannsaka samfélagslegt gildi virkjanasvæða

Þörf er á frekari rannsóknum á samfélagslegu gildi svæðanna við neðri Þjórsá áður en ákvörðun er tekin um virkjanir þar segir Guðmundur Hörður Guðmundsson, formaður Landverndar. Hann vill að ráðherrar vinni rammaáætlun vel og vandlega en ekki í flýti.

Í skýrslu verkefnastjórnar um rammaáætlun er 66 virkjunarkostum á landinu raðað annars vegar eftir verndunargildi og hins vegar nýtingargildi. Listinn gefur færi á því að meta stöðu ýmissa umdeildra virkjana innbyrðis. Þannig blasir við að Torfajökulssvæðið verði verndað þar sem verndunargildi þess var metið hæst. Þá má telja að virkjanir í Skaftá og Hólmsá séu ólíklegri hér eftir og Búlandsvirkjun og virkjun í Gjástykki munu eiga undir högg að sækja.

Grændalur lendir nokkurn veginn í miðjunni en þrjár virkjanir í neðri Þjórsá, við Urriðafoss, Hvamms- og Holtavirkjun sem og Bitruvirkjun verða hins vegar að teljast líklegri héreftir þar sem nýtingargildi þeirra er metið tiltölulega hátt miðað við verndargildi. Hellisheiðarvirkjun, sem er efst á nýtingarlista, er þegar orðin staðreynd.

Guðmundur fagnar því að jarðhitasvæði á hálendinu verði nú líklegast vernduð. Hann hefur hins vegar áhyggjur af því hvað virkjanir í neðri Þjórsá lenda lágt á verndunarlista en hann telur það vera vegna skorts á rannsóknum á samfélagslegu gildi þeirra svæða.

"Ráðherrar hafa þann kost að setja þessar í biðflokk og láta fara fram frekari rannsóknir á áhrifum þessarra virkjana." segir Guðmundur og bætir því við að Landvernd muni taka virkan þátt í umsagnarferli um væntanlega þingsályktunartillögu. "Það er nauðsynlegt að vinna þetta vel og vandlega, ekkert að vera að flýta sér."