Formaður dómaranefndar: Ummæli Guðjóns eru ekki svaraverð

Ummæli Guðjóns Þórðarsonar, þjálfara BÍ/Bolungarvíkur, eftir leik BÍ og Þróttar í gær hafa vakið talsverða athygli enda veltir Guðjón því upp hvort hörundslitur Tomi Ameobi hafi áhrif á hvernig íslenskir dómarar dæma í atvikum tengdum honum.

Vísir hafði samband við Gylfa Þór Orrason, formann dómaranefndar KsÍ, og spurði hvað honum finndist um þessi ummæli þjálfarans.

"Þau eru ekki svaraverð," sagði Gylfi og hafði engu við það að bæta.

Eins og svo oft áður hefur dómgæslan verið á milli tannanna á fólki í sumar. Sérstaklega virðist vera kvartað mikið yfir dómgæslu í 1. deildinni.

"Heilt yfir finnst mér dómgæslan hafa verið ágæt í sumar. Það er þannig að menn kvarta alltaf þegar dómarar gera mistök. Menn kvarta þegar mistökin lenda gegn þeim en gleyma að þeir hafa kannski grætt á mistökum dómara áður. Svona er þetta bara og eðli umræðunnar er að kvarta undan dómgæslunni. Viðbrögð við slíku eru tilgangslaus."

Það er mikið af nýjum dómurum að feta sín fyrstu spor í efstu deildunum og óhætt að tala um ákveðin kynslóðaskipti. Gylfi er nokkuð ánægður með hvernig til hefur tekist.

"Það eru ungir dómarar að koma inn og þeir eru að standa sig vel rétt eins og þeir reyndari. Heilt yfir er dómgæslan svipuð og síðustu ár," sagði Gylfi Þór.