Tottenham aftur upp í fimmta sætið

Heiðar Helguson lagði upp mark QPR er lið hans mátti þola 3-1 tap fyrir Tottenham í eina leik dagsins í ensku úrvalsdeildinni.

Gareth Bale skoraði tvívegis fyrir Tottenham og Rafael van der Vaart einu sinni. Yfirburðir Tottenham voru talsverðir í fyrri hálfleik en gestirnir náðu þó að bíta aðeins frá sér í seinni hálfleik.

Tottenham byrjaði leikinn af miklum krafti og komst Van der Vaart nálægt því að skora strax á þriðju mínútu en Paddy Kenny, markvörður QPR, varði glæsilega frá honum.

Emmanuel Adebayor fékk svo dauðafæri stuttu síðar en skallaði yfir markið og var ljóst að þetta yrði langur dagur fyrir nýliðana.

Heiðar átti fyrstu marktilraun QPR í leiknum er hann skot yfir úr ágætu færi eftir misheppnaða skottilraun Adel Taarabt.

Fyrsta markið kom svo á 21. mínútu. Van der Vaart og Aaron Lennon áttu laglegt samspil í aðdragandanum og lagði sá síðarnefndi boltann fyrir Gareth Bale sem skoraði með föstu vinstrifótarskoti eins og hann er þekktur fyrir.

Næsta mark heimamanna kom rúmum tíu mínútum síðar er boltinn féll fyrir Van der Vaart eftir skottilraun Ledley King af löngu færi. Hann var einn á auðum sjó og skoraði af öryggi.

Yfirburðir heimamanna semsagt algerir í seinni hálfleik og brá Neil Warnock, stjóri QPR, að skipta tveimur mönnum út af í hálfleik. Fitz Hall, varnarmaður QPR, hafði farið meiddur út af í upphafi leiksins og ákvað því Warnock að klára skiptingarnar sínar strax í hálfleik.

Það borgaði sig greinilega því QPR náði að klóra í bakkann á 61. mínútu. Heiðar Helguson átti þátt í markinu, hann skallaði boltann inn að marki eftir hornspyrnu en boltinn ratði beint á kollinn á Jay Bothroyd sem skoraði af stuttu færi.

En þegar tæpar 20 mínútur voru til leiksloka gerði Tottenham út um leikinn með þriðja marki sínu. Aftur var Bale þar að verki með föstu skoti og aftur eftir sendingu Aaron Lennon. Samspil þeirra var laglegt og markið afar snoturt.

Leikmenn QPR reyndu hvað þeir gátu til að sækja á lokamínútunum en allt kom fyrir ekki. Tottenham komst með sigrinum upp í fimmta sæti deildarinnar og ýtti þar með Liverpool aftur niður í það sjötta. QPR er í tólfta sæti með tólf stig.

Staðan í ensku úrvalsdeildinni