Stal byssu af eiganda Arsenal og skaut sig í hausinn

Stan Kroenke, eigandi Arsenal, hefur fengið nálgunarbann á fyrrum starfsmann sinn sem stal byssu af heimili hans og skaut sig síðan í hausinn.

Sjálfsmorðstilraunin mistókst reyndar hjá manninum sem var handtekinn og er nú vistaður á geðsjúkrahúsi.

Kroenke-fjölskyldan er skíthrædd við manninn og fór því fram á nálgunarbannið. Hann má því ekki koma nær fjölskyldunni en 100 metrum.

Kroenke er sterkefnaður maður en hann á einnig NFL-liðið St. Louis Rams og NBA-liðið Denver Nuggets. Eiginkona hans er erfingi Walmart-veldisins.