Allar Airbus vélar Qantas aftur í loftið

Ástralska flugfélagið Qantas hefur ákveðið að hefja á fulla notkun á risaþotunni Airbus A380 en vélarnar voru kyrrsettar fyrir tveimur mánuðum þegar hreyfill einnar þeirrar sprakk í loft upp. Félagið hafði þegar hafið notkun á vélinni í styttri ferðum en ferðir yfir kyrrahafið hafa legið niðri. Það breytist á sunnudaginn kemur þegar fyrsta ferðin verður farin frá Melbourne til Los Angeles. Sprengingin í hreyflinum, sem er frá Rolls Royce hefur verið rakin til olíuleka sem nú hefur verið komið í veg fyrir.