Owen: Ég er bara 31 árs

Michael Owen minnti hressilega á sig í gær þegar hann skoraði tvö mörk gegn Leeds í deildarbikarnum og lék afar vel. Owen segist eiga mörg góð ár eftir.

"Ég er enn aðeins 31 árs og á klárlega góð ár eftir. Það er alltaf pressa er maður spilar hjá þessu félagi enda ekki mörg tækifæri til þess að standa sig. Ef maður stendur sig ekki fær maður ekki að spila næstu tvo mánuði," sagði Owen sem er búinn að skora 11 mörk fyrir United í þeim 12 leikjum þar sem hann hefur fengið að byrja.

"Afgreiðslurnar hjá Owen voru frábærar. Þessi tölfræði hans er ótrúleg og við erum afar ánægðir með hann. Þar sem við erum með aðra frábæra framherja þá er hann ekki að fá þann spiltíma sem hann á skilið og það er miður," sagði Sir Alex Ferguson, stjóri Man. Utd.