„Einhver þarf að kenna henni rangstöðuregluna“

Þeir Andy Gray og Richard Keys, sjónvarpsmenn hjá Sky Sports, hafa beðist afsökunar á ummælum sínum sem þeir höfðu um Sian Massey aðstoðardómara.

Massey var á línunni í leik Liverpool og Wolves á laugardaginn en í spjalli sín á milli fyrir leikinn lýstu þeir vonbrigðum sínum með að kona væri í dómarateymi leiksins.

Þetta sögðu þeir að vísu ekki í beinni útsendingu en ummælin náðust á upptöku sem síðar var lekið í fjölmiðla.

Meðal þess sem þeir sögðu var að einhver þyrfti að kenna Massey rangstöðuregluna og að það væri fullvíst að hún myndi valda einhverjum vandræðum í leiknum.

Massey, sem er 25 ára gömul, stóð sig hins vegar vel á leiknum og reyndist hafa rétt fyrir sér að flagga ekki rangstöðu á Raul Meireles í aðdraganda fyrsta marks Liverpool í leiknum.

Talsmaður Sky Sports sagði ummælin algerlega óásættanleg og sagði þá Gray og Keys harma ummælin og að þeir hefðu beðist afsökunar.

Þeir verða aftur í loftinu í kvöld þegar að Chelsea mætir Bolton og munu þeir væntanlega þurfa að skýra mál sitt þá.