Terry: United þarf vissulega að fara að hafa áhygjur af okkur

John Terry, fyrirliði Chelsea, var kátur í viðtali við BBC eftir 4-0 stórsigur á Bolton á útivelli í ensku úrvalsdeildinni í kvöld. Chelsea er aftur að ná sínum fyrri styrk og er líklegt til að fara að blanda sér í baráttuna um enska meistaratitilinn.

„Það er langt síðan að við náðum að spila svona vel á útivelli og þetta var því mjög ánægjulegt," sagði John Terry.

„Markið hans Didier var líklega það besta á tímabilinu til þessa," sagði John Terry um fyrsta mark leiksins sem Didier Drogba skoraði með þrumuskoti af um 30 metra færi.

„Sendingar okkar voru hnitmiðaðar í þessum leik allt til enda enda höfðum við unnið mikið í þeim alla þessa viku. United þarf vissulega að fara að hafa áhygjur af okkur," sagði Terry en Chelsea er þó enn sjö stigum á eftir Manchester United.