Chelsea-liðið að komast í gamla formið - vann 4-0 sigur á Bolton

Chelsea vann sinn annan leik í röð í ensku úrvalsdeildinni þegar liðið sótti þrjú stig til Bolton og vann þar góðan 4-0 sigur. Þetta var aðeins annað tap Bolton-liðsins á Reebok-vellinum á tímabilinu.

Chelsea er nú fjórum stigum á eftir Manchester City (3. sæti) en liðið vantar enn sjö stig til þess að ná toppliði Manchester United sem á auk þess leik inni.

Chelsea hefur unnið þrjá síðustu leiki sína í deild og bikar með markatölunni 13-0 og það er óhætt að segja að þeir séu að komast í gamla góða formið.

Það er aðra sögu að segja af Bolton-mönnum sem þarna töpuðu öðrum leiknum í röð og þeim fjórða í síðustu fimm leikjum. Liðið hefur aðeins náð í eitt stig af síðustu fimmtán mögulegum og er komið alla leið niður i 10. sæti deildarinnar.

Didier Drogba skoraði fyrsta markið á 11. mínútu með þrumuskoti af um 30 metra færi. eftir að Grétar Rafn Steinsson hafði misst frá sér boltann. Markið hjá Drogba var stórglæsilegt.

Florent Malouda kom Chelsea í 2-0 fjórum mínútum fyrir hálfleik þegar hann fylgdi á eftir eigin skoti eftir að fyrra skotið hans fór í varnarmanninnn Gary Cahill.

Nicolas Anelka gerði síðan nánast út um leikinn þegar hann kom Chelsea í 3-0 á 56. mínútu eftir sendingu Mickael Essien og undirbúning Florent Malouda.

Brasilíumaðurinn Ramires skoraði síðan fjórða markið á 74. mínútu þegar hann fylgdi eftir skoti Nicolas Anelka sem fór í varnarmann. Ramires opnaði þar með loksins markareikning sinn í enska boltanum í sínum 24. leik með Chelsea-liðinu.

Grétar Rafn Steinsson snéri aftur í lið Bolton eftir meiðsli og lék allan leikinn í hægri bakverðinum.