Ancelotti klár í slaginn á nýjan leik

Carlo Ancelotti, fyrrum knattspyrnustjóri Chelsea, segist klár í slaginn á nýjan leik bjóðist gott tækifæri. Hann segist aldrei hafa sagst ætla að taka sér eins árs frí frá störfum sem knattspyrnustjóri.

Ancelotti var rekinn að loknum síðasta leik Chelsea í ensku úrvalsdeildinni á síðustu leiktíð. Liðið vann engan titil en hafði árið áður unnið tvöfalt undir stjórn Ítalans.

„Ég hef aldrei sagst vilja taka mér árs frí. Ég hef sagt að það væri ekki vandamál að vera fjarri leiknum í ár á meðan ég leita mér að nýju verkefni. Ef það kemur góð lausn, rétta félagið þá væri ég mjög ánægður," segir Ancelotti.

Ancelotti segist vilja hefja hvern dag á að mæta á æfingasvæðið. Hann hafi ekki saknað þess í sumar enda voru engir leikir í gangi. Hann leggur áherslu á að hann sé ekki bitur út í forsvarsmenn Chelsea fyrir brottvikninguna úr starfi knattspyrnustjóra. Forráðamenn félagsins biðu ekki boðanna og ráku Ancelotti strax að loknum leiknum gegn Everton.

„Hver hefði verið tilgangurinn að bíða?" segir Ancelotti. „Ef þeir hafa eitthvað að segja mér vil ég frekar heyra það á stundinni. Ég taldi alltaf að framtíð mín myndi ráðast af úrslitunum. Ég vildi vera áfram," segir Ancelotti við breska fjölmiðla.

Hann leggur áherslu á að framkvæmdastjóri Chelsea, Ron Gourlay, hafi staðið fagmannlega að brottrekstrinum. Leikmenn hafi verið komnir í rútuna og þeir hafi rætt málin inni í búningsklefanum.