Umfjöllun: Fylkismenn hirtu stigin þrjú í Keflavík

Fylkismenn sóttu þrjú stig suður með sjó í gær þegar lið bar sigur úr býtum gegn Keflvíkingum, 2-1, á Nettóvellinum. Albert Brynjar Ingason og Ingimundur Níels Óskarsson gerðu mörk Fylkismanna, en Guðmundur Steinarsson skoraði eina mark Keflvíkinga.

Leikurinn hófst rólega og liðin voru lengi í gang. Eftir um korters leik þá fóru gestirnir í gang og sóttu án afláts. Valur Fannar Gíslason átti fínan skalla sem stefndi beint í markið, en Ómar Jóhannsson sló boltann aftur fyrir markið. Uppúr því fengu Fylkismenn hornspyrnu og þá kom fyrsta mark leiksins. Albert Brynjar Ingason skallaði boltann óverjandi í netið og gestirnir komnir yfir.

Næstu mínútur voru gestirnir með öll völd á vellinum og það var eins og að Keflvíkingar væru ekki á vellinum. Fylkismenn fengu nokkur fín færi en ekki fór boltinn í netið.

Tíu mínútum fyrir lok fyrri hálfleiks fengu Keflvíkingar hornspyrnu. Boltanum var spyrnt inn í teig og þar virtist varnarmaður Fylkis brjóta á leikmanni Keflvíkinga. Vilhjálmur Alvar Þórarinsson, dómari leiksins, dæmdi vítaspyrnu, öllum að óvörum og Fylkismenn voru virkilega ósáttir. Guðmundur Steinarsson skoraði örugglega úr spyrnunni og staðan því orðin 1-1.

Rétt fyrir lok fyrri hálfleiks fengu Fylkismenn einnig vítaspyrnu þegar Hilmar Geir Eiðsson, leikmaður Keflvíkinga, braut á Trausta Birni Ríkarðssyni sem var sloppinn einn í gegn. Ingimundur Níels Óskarsson fór á punktinn og skoraði, en Ómar Jóhannsson, markvörður Keflvíkinga, var í boltanum. Staðan var því 2-1 fyrir Fylki í hálfleik.

Síðari hálfleikurinn var fjörugur í byrjun og liðin sóttu bæði mikið á mark andstæðingsins. Þegar líða tók á síðari hálfleikinn tóku Fylkismenn öll völd á vellinum og fengu hvert dauðafærið á fætur öðru en það var einn vandi, þeim var fyrirmunað að koma boltanum framhjá Ómari Jóhannssyni í marki Keflvíkinga. Ómar varði oft á tíðum meistaralega einn á móti Fylkismanni og ótrúlegt að gestirnir höfðu aðeins gert tvö mörk.

Hvorugu liðinu tókst að skora fleiri mörk í leiknum og því varð niðurstaðan 2-1 sigur Fylkismanna.

Keflavík 1 – 2 Fylkir

0-1 Albert Brynjar Ingason (21.)

1-1 Guðmundur Steinarsson, víti (36.)

1-2 Ingimundur Níels Óskarsson, víti (44.)



Skot (á mark): 10– 10 (7-8)

Varin skot: Ómar 7 – 5Fjalar

Horn: 7– 7

Aukaspyrnur fengnar: 18–10

Rangstöður: 1-1



Dómari: Vilhjálmur Alvar Þórarinsson 6