Kjartan Henry: Það á ekki að vera hægt að klikka víti

Kjartan Henry Finnbogason, framherji KR, tók undir með blaðamanni að kalla mætti sigurinn Vesturbæjarliðsins baráttusigur.

„Það er alltaf svona, þegar maður ver víti þá fær maður spark í rassinn. Það gerðist í dag. Við byrjuðum þetta ekki nægilega vel en náðum að skora tvö mörk og það eru mörkin sem telja. Baráttusigur."

Kjartan hefur verið ískaldur á punktinum í sumar og skoraði af fádæma öryggi.

„Ég er búinn að æfa vítin og þangað til ég klúðra held ég áfram að taka vítin. Það á ekki að vera hægt að klikka víti. Það er bara einbeitingarleysi. Það var öruggt í dag, í innri stöngina."

Kjartan var diplómatískur í svörum um hvort liðið hefði ekki tekið stórt skref í átt að titlinum í kvöld.

„Bara eitt af þessum mörgu skrefum. Verður maður ekki að vera dipló þegar liðin í kringum okkur eru að vinna sína leiki. Það eina sem við getum gert er að hugsa um okkur og hafa áhrif á okkar frammistöðu. Ef við vinnum leiki erum við að taka skref í átt að titlinum."

Kjartan hefur verið duglegur að sanka að sér spjöldum í sumar og þarf að passa sig ætli hann ekki að missa úr fleiri leiki vegna leikbanns.

„Ég má ekki fá eitt í viðbót, þá fer ég í bann aftur. Ég er náttúrulega ákafur og þarf að berjast fyrir mínu. Það er stundum sem maður á skilið að fá spjöld og stundum ekki. Ég verð að passa mig, það er rétt, og reyna að hrósa dómaranum frekar en að öskra á hann," sagði Kjartan léttur í leikslok.