Kem með mjög sterkar skoðanir inn í þetta lið

Bjarnólfur Lárusson var í gær ráðinn eftirmaður Andra Marteinssonar í þjálfarastól Víkinga. Víkingar fengu aðeins 4 stig af 30 mögulegum í síðustu tíu leikjum sínum undir stjórn Andra og sitja í fallsæti þegar mótið er hálfnað. Víkingar fóru ekki langt eftir eftirmanni Andra því Bjarnólfur hefur verið að gera flotta hluti með 2. flokk félagsins.

„Þetta gerðist hratt og það er ákveðin herskylda í þessu að stíga upp og taka við liðinu úr því sem komið var. Ég hef ákveðið að tala ekki opinberlega um það sem hefur gerst hjá liðinu. Þetta er bara nýr kafli á tímabilinu sem ætlum að byrja ferskir á í dag. Það eru ellefu leikir fram undan og ég kvíði þessu verkefni ekki neitt,“ segir Bjarnólfur en hann segist þó aldrei hafa stefnt að því að verða þjálfari í efstu deild því honum hafi liðið vel með að þjálfa ungu strákana.

„Ég er búinn að vera í Víkingi síðustu tvö ár og hef fylgst vel með á hliðarlínunni. Ég þekki liðið sem hefur verið að spila og hef séð leikina. Ég kem með mjög sterkar skoðanir inn í þetta lið,“ segir Bjarnólfur en fram undan eru leikir við Þór og Stjörnuna en Víkingsliðið náði 4 af 7 stigum sínum í fyrri leikjunum á móti þessum liðum. Bjarnólfur segir að sínar áherslur muni koma fljótt í ljós.

„Ég er rosalega ánægður með að fá Tómas Inga með mér í þetta. Við höfum unnið áður saman á knattspyrnuvellinum í Eyjum og þekkjumst vel. Ég treysti honum hundrað prósent og hann verður mér mjög mikilvægur,“ segir Bjarnólfur. Hann og Tómas Ingi voru meðal annars aðalmennirnir í liði ÍBV fyrir tíu árum sem tapaði Íslandsmeistaratitlinum á markatölu. „Það verður auðvelt fyrir okkur að innleiða Eyjabaráttuna í liðið,“ segir Bjarnólfur í léttum tón.

Hann ætlar ekki að bæta við leikmannahópinn. „Þeir sem eru í þessum hópi verða að sýna það og sanna að þeir eigi skilið að vera í Víkingsliðinu því annars er glugginn opinn.“