Liverpool vann 2-0 sigur á tíu mönnum Everton

Liverpool vann 2-0 sigur á nágrönnum sínum í Everton í 216. Merseyside-slagnum á Goodison Park í hádegisleik ensku úrvalsdeildarinnar. Liverpool fór alla leið upp í 4. sæti deildarinnar með þessum sigri en það gæti breyst þegar hinir leikirnir í umferðinni klárast.

Liverpool var manni fleiri í 68 mínútur en þurfti að bíða þangað til á 71. mínútu til að brjóta loksins ísinn á móti baráttuglöðum Everton-mönnum sem þurftu ósanngjarnt að spila tíu á móti ellefu.

Everton byrjaði leikinn mun betur og þeir Tim Cahill, Louis Saha og Sylvain Distin fengu allir fín færi á upphafsmínútunum en á móti var Luis Suarez klaufi að skora ekki úr frábæru skallafæri hinum megin.

Leikurinn breyttist hinsvegar á 22. mínútu þegar Martin Atkinson dómari reif upp rauða spjaldið og rak Jack Rodwell útaf fyrir tæklingu á Luis Suarez. Þetta var hræðileg ákvörðun því þetta var ekki rautt, varla gult og eiginlega ekki einu sinni brot því Rodwell virtist vinna boltann.

Dirk Kuyt fékk frábært færi til að koma Liverpool yfir á 44. mínútu þegar Phil Jagielka felldi Luis Suárez innan teigs og Martin Atkinson dæmdi víti. Tim Howard varði hinsvegar vítaspyrnuna frá Kuyt.

Charlie Adam átti skömmu seinn þrumuskot í slá en tíu menn Everton sluppu með skrekkinn og fóru með hreint mark inn í hálfleik.

Liverpool þurfti að bíða í rúmar 70 mínútur eftir fyrsta markinu en þeir Craig Bellamy og Steven Gerrard voru skömmu áður komnir inn á völlinn.

Andy Carroll, líklegast slakasti maður vallarsins, skoraði fyrsta markið á 71. mínútu eftir sendingu José Enrique og undirbúning Bellamy. Carroll skoraði því í fyrsta Merseyside-slagnum sínum.

Luis Suarez bætti við öðru marki á 82. mínútu leiksins eftir varnarmistök Leighton Baines og Sylvain Distin. Boltinn féll fyrir fætur Suarez í teignum og hann skoraði örugglega.