Sony kaupir Ericsson út úr farsímafyrirtæki

Talið er að sameiginlegt farsímafyrirtæki Sony og Ericsson verði yfirtekið af Sony.

Sony Ericsson var stofnað árið 2001 og naut mikillar velgengni fyrstu árin. Fyrirtækið var leiðandi í þróun myndavéla- og tónlistarfarsíma. Fyrirtækið hefur þó átt í miklum erfiðleikum með að halda í við hraða þróun snjallsíma síðan Apple kynnti iPhone árið 2007.

Talið er að Sony muni greiða rúmlega milljarð evra fyrir hlut Ericsson í fyrirtækinu.

Með yfirtökunni fær Sony aðgang að einkaleyfum Ericsson. Stjórnarformaður Sony, Howard Stringer, sagði að einkaleyfin geri fyrirtækinu kleift að samhæfa vörur sínar. Þannig munu fartölvur, sjónvörp, spjaldtölvur og snjallsímar Sony geta tengst auðveldlega og þannig opnað fyrir nýjan heim rafrænnar afþreyingar.