Þjóðarráð Líbíu rannsakar dauða Gaddafi

Talsmaður Þjóðarráðsins í Líbíu sagði í dag að morðingjar Muammars Gaddafi, fyrrum einræðisherra Líbíu, yrðu dregnir fyrir dóm.

Varaformaður Þjóðarráðsins, Abdel Hafiz Ghoga, sagði að mál Gaddafis verði meðhöndlað eins og hvert annað morð. Hann sagði Þjóðarráðið þegar hafa skipað rannsóknarnefnd til að komast að hinu sanna í málinu.

Ghoga sagðist vera handviss um að banamaður Gaddafi hafi stjórnast af eigin duttlungum og ólíklegt sé að byltingarherinn sjálfur hafi staðið fyrir morðinu.

Eftir að ljóst var orðið að Sirte hefði fallið flúði Gaddafi ásamt fylgdarliði sínu. Bílalestin varð síðan fyrir sprengjuárás NATO þar sem fyrrverandi einræðisherrann særðist.

Gaddafi var drepinn eftir að byltingarhermenn fundu hann í holræsi rétt fyrir utan Sirtre.