Ferguson ráðleggur Van der Sar að hætta

Sir Alex Ferguson, stjóri Man. Utd, segir að það sé rétt ákvörðun hjá markverðinum Edwin van der Sar að leggja skóna á hilluna í sumar eftir afar farsælan feril.

Hinn fertugi Van der Sar hefur enn og aftur átt frábæra leiktíð og margir sem vilja sjá hann spila áfram. Þar á meðal eru nokkrir liðsfélagar hans sem sjá ekkert því til fyrirstöðu að Hollendingurinn taki eitt ár í viðbót.

Ferguson vill þó að Van der Sar standi við ákvörðunina svo hann hætti ekki á slæmum nótum þegar gengið verður ekki eins gott og í dag.

"Ef ég ætti að veita Edwin ráðgjöf myndi ég segja honum að hætta. Hann er á toppnum núna en þegar menn komast á ákveðinn aldur getur byrjað að halla afar hratt undan fæti," sagði Ferguson.

"Ég myndi ekki vilja sjá það gerast fyrir Edwin.  Hann á skilið að hætta á toppnum og vonandi gerir hann það. Hann hefur átt frábæran feril."