Segir al-Maliki bera ábyrgð á óöldinni

Varaforseti Íraks, Tariq al-Hashemi, segir að forsætisráðherrann Nouri al-Maliki beri ábyrgð á ofbeldisöldunni sem ríður nú yfir landið. Tugir manna létu lífið í sprengjuárásum í gær og flestar beindust árásirnar að Sjía múslimum.

Varaforsetinn sem er súnní múslimi hefur verið sakaður um að leggja á ráðin um hryðjuverk og er hann nú í felum í Kúrdahéruðum landsins. Hann segir að forsætisráðherrann, sem er sjíti, ætti að beina kröftum sínum að öryggi landsmanna í staðinn fyrir að vera að eltast við stjórnmálamenn sem elski föðurland sitt. Líklegast er talið að Al Kaída hafi skipulagt árásirnar, en samtökin eru súnní trúar, líkt og varaforsetinn.