Hótar Jólasveininum lífláti

Eins og tíðkast víða um heim skrifaði hin 13 ára gamla Makeeda Austin jólalegt bréf til Jólasveinsins. Hún tjáði Sveinka hvað hana langaði í jólagjöf og skreytti bréfið með kossum. En Makeeda er engin venjuleg stelpa. Hún hótaði að myrða jólasveininn ef hann myndi ekki uppfylla óskir hennar.

Makeeda hefur greinilega engar áhyggjur af því að komast á óþekktarlista Jólasveinsins.

Móðir Makeedu segir í viðtali við breska blaðið The Daily mail, að dóttir sín sé afar kröfuhörð og hún óttist hvað muni gerast þegar hún fær ekki gjafirnar frá Jólasveininum.

Makeeda bað um Blackberry síma, Converse-skó, föt, peninga og Justin Bieber í jólagjöf. Móðir hennar segist ætla að reyna að gefa henni snjallsímann og eitthvað af peningum en óttast þó að hún muni týna símanum eins og hún hefur margoft gert.

En Makeeda lét sér ekki nægja að standa í morðhótunum við Jólasveininn. Hún hótaði einnig að drepa hreindýrin hans og sjóða þau.