Íslendingur, sem rekur matvælafyrirtæki í Noregi, vill leggja þrjá milljarða króna í laxeldi í Arnarfirði og fiskréttaverksmiðju á Bíldudal og skapa þannig yfir fimmtíu ný störf á Vestfjörðum.

Félagið Arnarlax hefur undirbúið verkefnið í þrjú ár en aðalfjárfestirinn á bak við áformin fæddist og ólst upp á Bíldudal og heitir Matthías Garðarsson. Sem ungur maður á háskólaárum í fiskvinnslunámi settist Matthías að í Noregi og hefur síðan byggt upp stærsta fyrirtækið í sveitarfélaginu Leirfjord, með um áttatíu manns í vinnu.

Nú vill hann gera það sama á sínum æskuslóðum. Hann segist hafa verið í Noregi í 34 ár og kunna orðið talsvert í laxeldi og rekstri matvælavinnslu og hann vilji nú nýta þessa kunnáttu í þágu Bíldudals og Arnarfjarðar.

Fyrirtæki hans, Salmus, elur lax í sjó í Leirfirði en mestu umsvifin eru þó í fiskréttaverksmiðju þar sem verða til vörur tilbúnar fyrir verslanir í Evrópu. Sambærilega matvælaiðju vill Matthías byggja upp á Bíldudal og leggur höfuðáherslu á að þar verði til fullunnar laxaafurðir. Verið sé að tala um 50-60 störf.

Í Arnarfirði vill hann framleiða þrjúþúsund tonn af laxi á ári. Spurður hvort þetta verði stóriðja fyrir Vestfirði segir Matthías ljóst að ef hægt sé að ala lax í Arnarfirði sé enginn vafi á því að hægt sé að byggja upp slíkt iðnfyriræki á Bídudal.

Matthías vonast til að Arnarlax geti hafið starfsemi í Arnarfirði næsta vor og að tilskilin leyfi fáist fljótlega frá stjórnvöldum. Hann segir fyrirtækið tilbúið að fara í gang með verkefnið ef leyfin verði þannig úr garði gerð að þeir telji þorandi að leggja út í fjárfestinguna með samstarfsaðilum í Danmörku og Þýskalandi.