Verkfræðingur skipaður forsætisráðherra í Líbíu

Þjóðarráðið í Líbíu hefur valið Abdurrahim El-Keib til að taka tímabundið við forsætisráðherrastól landsins. El-Keib lofaði að landið muni fylgja alþjóðalögum og virða mannréttindi þegna sinna.

El-Keib er prófessor í verkfræði og hefur verið í útlegð síðustu ár. Hann mun gegna embætti forsætisráðherra þangað til að lokið hefur verið við nýja stjórnarskrá Líbíu. Þegar stjórnarskráin liggur fyrir munu kosningar fara fram í landinu.

Forsætisráðherrann sagðist skilja áhyggjur alþjóðasamfélagsins vegna ástandsins í Líbíu. Hann sagði að þetta væri hin nýja Líbía og íbúar landsins verði nú að læra að lifa án hrottalegs einræðisherra.

Aðspurður um hugsanleg mannréttindabrot af hálfu byltingarhermanna - þá sérstaklega með tilliti til dauða Muammars Gaddafi - þá bað El-Keib um tíma til að rannsaka málið. Hann sagði að fjölmiðlar yrðu að gera sér grein fyrir að byltingunni lauk nýlega og að landið sé enn að vinna úr öllum þeim upplýsingum og atburðum sem áttu sér stað Sirte, Bani Walid og Trípólí.