Íslenskir hestar vanræktir: Eigandinn ætlar að áfrýja

Inge Johanson, eigandi íslensku hestanna í Svíþjóð segist ætla að áfrýja ákvörðun heilbrigðisyfirvalda sem tóku af honum tuttugu hross vegna slæmrar umhirðu. Hann á yfir höfði sér ákæru um dýraníð. Johanson segist ekki hafa fengið tækifæri til þess að laga aðbúnað dýranna en af myndum af dæma eru þau afar illa haldin.

Hann segir í samtali við sænska blaðið Arbetarbladet að járningamaður hafi svikið sig um að koma til þess að tálga hófa hestanna en eins og sjá má á meðfylgjandi mynd hefur það ekki veið gert í mjög langan tíma. Hann viðurkennir ennfremur að það hafi verið mistök að láta suma hestana hýrast inni í marga mánuði en augljóst er að ekki hefur verið mokað undan þeim í langan tíma.

Hann er hinsvegar afar ósáttur við viðbrögð lögreglu og dýralæknisins en fjórir hestar voru aflífaðir um leið og yfirvöld komust í málið. Hann segir að það hafi verið ónauðsynlegt og að dýrin hafi ekki verið eins illa haldin og dýralæknirinn vildi meina.

Málið hefur valdið mikilli ólgu í Sandviken en Johanson var um margra ára skeið formaður áhugamannafélags um íslenska hestinn. Félagsmenn hafa sumir gagnrýnt stjórn félagsins harðlega og sagt að í mörg ár hafi menn vitað af meðferð mannsins á dýrum sínum án þess að nokkuð væri að gert.