Geimfarar sem líktu eftir ferð til Mars lausir eftir hálft annað ár

Söguleg stund verður í Moskvu í dag þegar stálhylki með sex geimförum innanborðs verða opnuð einu og hálfu ári eftir að geimfararnir voru læstir inn í þeim.

Á þessu eina og hálfa ári sem liðið er hafa geimfararnir, þrír Rússar, tveir Evrópubúar og einn Kínverji líkt eftir ferð fram og til baka milli Jarðarinnar og Mars. Á meðan hafa nákvæmar rannsóknir staðið yfir á því hvernig mannshugurinn og líkaminn bregðast við í langferðum úti í geiminum. Meðal annars hafa geimfararnir líkt eftir göngu á Mars íklæddir geimbúningum.

En nú er þessari rannsókn lokið og geimfararnir munu lenda, ef svo má að orði komast, klukkan tvö eftir hádegið að staðartíma.