Þjóðverjar loksins tilbúnir fyrir "nasistaþáttinn“ í Star Trek

Star Trek þættirnir hafa notið mikilla vinsælda í Þýskalandi eins og víðast hvar annars staðar í heiminum í gegnum árin. Einn þáttur í upprunalegu seríunni var þó aldrei sýndur þar í landi en á því verður breyting í kvöld.

Í þættinum sem um ræðir klæða félagarnir dr.Spock og Kirk kafteinn sig upp í búningja SS foringja til þess að læða sér inn í raðir öfganinnaðs geimveruþjóðflokks sem hafði tekið upp siði og venjur Þýskalands nasismans, eins undarlega og það nú hljómar.

Þátturinn var frumsýndur árið 1968 og þegar þýska ríkissjónvarpið hóf sýningar á þáttunum um miðjan áttunda áratuginn þótti innihaldið of eldfimt fyrir þýska áhorfendur.

Þættirnir voru síðan endursýndir nokkrum sinnum, síðast á tíunda áratuginum en alltaf þótti nasistaþátturinn of hneykslanlegur. Nú er hinsvegar enn og aftur verið að endursýna þættina og í þetta skiptið fá nasistarnir að fljóta með.