Gríðarleg eftirvænting fyrir Modern Warfare 3

Framhald eins vinsælasta tölvuleiks veraldar fer í sölu á miðnætti í dag. Talið er að Modern Warfare 3 eigi eftir að slá öll sölumet en gríðarleg eftirvænting er fyrir honum.

Leikurinn verður fáanlegur víðsvegar um Evrópu á miðnætti í dag. Talið er að þúsundir tölvuleikjaaðdáenda muni bíða í biðröðum í Bretlandi.

Ekki voru þá allir reiðubúnir að bíða. Franskir fjölmiðlar greindu frá því í dag að þúsundum eintaka af leiknum nýja hafi verið stolið í dag.

Call of Duty: Black Ops, forveri Modern Warfare 3, var einn vinsælasti leikur allra tíma. Talið er að sölutekjur leiksins hafi verið um einn milljarður dollara á aðeins sex vikum. Talsmenn Infinity Ward, framleiðanda leiksins, vonast til að selja um 20 milljón eintök áður en nýtt ár gengur í garð.

Leikurinn nýji er beint framhald af Modern Warfare 2 en þar eru spilendur í mismunandi hlutverkum hermanna sem berjast gegn innrás Rússa í Evrópu og Bandaríkjunum.