Suzanne Bjerrehuus hneykslar Dani að nýju

Danska rithöfundinum og leikkonunni Suzanne Bjerrehuus hefur aftur tekist að valda mikilli hneykslun meðal landa sinna.

Bjerrehuus, sem orðin er 63 ára gömul sagði í samtali við tímaritið Se og Hör í vikunni að hippatíminn í Danmörku, það er sjöundi áratugur síðustu aldar hefði verið ein samfelld veisla fyrir sig og skólafélaga sína. Þau hefðu synt í áfengi og stundað hópkynlíf af miklum krafti. Hópkynlífið var jafnvel stundað með kennurunum.

Bjerrehuus hefur átt auðvelt með að hneyksla Dani. Síðast þegar hún greindi opinskátt frá ástarsambandi sínu við 17 ára gamlan son fyrrverandi kærasta síns.

Bjerrehuus sem talin er ein helsta femme fatale í Danmörku hefur skrifað þrjár bækur en er einnig þekkt fyrir kvikmyndaleik. Hún lék m.a. í einni af fyrstu stjörnumerkjamyndunum svokölluðu, það er myndinni Í merki nautsins.

Þá hefur hún reynt fyrir sér í pólitík. Bauð sig fram til þings fyrir Íhaldsflokkinn á Amager en var hafnað af kjósendum eftir að hún lýsti opinberlega yfir stuðningi sínum við frístaðinn Kristjaníu.